Tavba bandani Parvardigoriga olib boradigan yo‘l, mo‘minning oxirat uchun yiqqan zaxirasi, dunyoyu oxiratda zafar qozonganlarning dastmoyalaridir. Hasrat va nadomat vaqti bo‘lgan qiyomat kunida kimdir najot topsa, u ham Alloh taolo uchun xolis qilingan nasuh tavba sababidan najot topadi. Yolg‘iz nasuh tavbagina – Allohni bizdan rozi qiladi, Uning g‘azabidan bizni qo‘riydi. U gunohlarni o‘chiradi, ayblarni yashiradi va insonning qalbiyu nafsini to‘g‘ri yo‘lga yo‘latadi.