Kitobning avvali bir go‘dakning dunyoga kelishi bilan boshlanadi. Ke­yin u bolakayning tabiatida uni boshqalardan ajratib turuvchi fazilatlar sezila boshlaydi. Ulg‘ayganidan so‘ng maʼlum vaqt savdo-sotiq ishlari bilan shug‘ullanadi, keyinchalik uylanadi, farzandli bo‘ladi...

Keyin siz ham mutolaa davomida u duch kelgan hodisalarga duch kela bosh­laysiz. Go‘dakligida unga ko‘z-quloq bo‘lishni, bolaligida u bilan birga o‘ynashni, ulg‘aygach do‘stlashishni, tijorat uchun yo‘lga chiqqanida karvoniga qo‘shilishni xohlaysiz. Turmush qurib, ota bo‘lganidan so‘ng esa shu oilaning aʼzosi bo‘lishni istab qolasiz. Xayolan o‘sha zamonlarga tushib qolganday bo‘lasiz, go‘yo.

So‘ng hikoya davomida siz suygan qahramonning ko‘zlarida bir mayuslik aks etadi, doim tabassumli yuziga qayg‘u soya sola boshlaydi. Nimaga degan savol tug‘ilishi tabiiy. Bular ortida esa hamma narsa endi boshlanayotgan bo‘ladi. Kutilgan xushxabar amalga osha boshlaydi.

Kitobni o‘qib bo‘lgach esa biz hayotimizdagi eng buyuk inson bilan tanishganimizni tushunib yetamiz. Bu bir tanishuv va muhabbat qissasi bitilgan kitobdir.